ХРИСТИНА ДЕОЛСКА, МИЛЕ ЃОРЃИЈОСКИ
Библиотека: НОВИ ХОРИЗОНТИ
Издавач: ОРИОН-Делчево
Уредник: Миле Ѓорѓијоски
Сите тишини во аглите заборавени,
и сите празнини меѓу будноста
и сонот оставени
ќе воскреснат да го стасаат времето.
Да го стасаат времето можат
само оние што одат пред него.
Оние што никој не ги смета за живи
никогаш нема да воскреснат.
Најмногу самотници има меѓу оние
што одат пред своето време.
И будните патат од кошмарни соништа.
Чекорењето по работ,
предизвик за оние на кои
ќор-сокакот им е прибежиште,
оние што секогаш
заминуваат
без да стасаат некаде.
Го чекаме неизвесното распослани
на парче време под сводот
на небесниот часовник.
Ја предизвикуваат иднината.
Чекорат по работ на бездната.
И оние што го следат слепиот водач
имаат свои прибежишта – ќорсокаците!
Најдалеку стигнуваат оние
што не му вртат грб на минатото.
